|
UngFolk 2010 vil gå føre seg på Seljord Følkehøgskule 20. - 24. juli (veke 29). Nytt av året er kurs i folkedansteater! Sjekk ut kurstilboda i venstre marg for fleire detaljar om kurs og lærarar!
Påmelding skjer via e-post, sms, telefon eller post til leiar i Telemark Folkemusikklag, Hæge Manheim. Du må oppgje følgjande: Namn, adresse, fødselsår, mobil og e-post til deltakar; namn, mobil og e-post til føresette; kva for kurs du vil melde deg på, og kor lang erfaring du har. Påmeldingsfrist 10. juni. Dersom ikkje anna blir spesifisert, reknar me med at påmeldinga er standard - sjå "om UngFolk" for meir info om ulike prisalternativ!
UngFolk er også Telemarkfestivalens offisielle kurstilbod for barn og unge i folkemusikk og folkedans. Programmet for årets kurs blir lagt ut på nettsidene så snart alle detaljar er klare. I mellomtida kan du lese meir om kva me gjorde på UngFolk 2009 nedanfor!
På formiddagane og ettermiddagane fram til ca kl 15 hadde me undervisningsøkter onsdag og torsdag og laurdag. Onsdag etter undervisninga hadde me ein dugeleg gåtur opp til Heivatn. Dei fleste var nok glade for at Granliens firhjuling frakta oss det siste stykket! Me fylte opp batteria med frukt og drikke ved Heivatn, og ein del tok seg ein dukkert før det bar ned att til lærarkonsert. Rundt 40 publikumarar utanifrå kom også for å sjå UngFolklærarane i aksjon, og det vart verkeleg ein konsert med driv i! Endå så trøytte og slitne dei fleste deltakarane var, meinte veldig mange dette var ei topp oppleving.
 
Torsdag ettermiddag grilla og bada me på Setflot, rett ved Spjotsoddbrua i Kviteseid. Det var kjempefint vèr, og rikeleg med tid til bading, padling og båtkøyring. I kveldinga benka me oss i lavoen rett ovanfor Granlien og fekk høyre Jon Svartdal levandegjere dei fantastiske historiane til Lugar-Ola.
Fredag reiste heile UngFolk til Bø. Det vart både buskspel, mat på Pizzafjoset og deltakarkonsert, før dei minste returnerte til Granlien. Dei eldste skulle ha møtt Vamps Øyvind Staveland, men dette utgjekk dessverre. Men konserten med Vamp fekk både dei eldste deltakarane og lærarane med seg! Dei yngste hadde ei spanande fotballturnering som vart avgjort med straffesparkkonkurranse etter at to lag hadde både lik poengsum og same målforskjell. Vinnarlaget valte rett nok ein film med 11-årsgrense til kveldens kinoframsyning, men den var noko skummel, så ein del spela SingStar og Gruble saman med nokre av dei vaksne i staden...
Laurdag vart UngFolk avslutta tradisjonen tru med deltakaranes eigen kappeleik. Granlien var fyllt opp til bristepunktet av ivrige foreldre, søsken og besteforeldre, og deltakarane viste profesjonelt fram alt det dei hadde lært. Juryen, sett saman av Anna Vinjerui Lid, Bjønn Raftevold Rue og Per Å. Omholt, avgjorde at folkemusikkbandet vann prisen for beste innslag, eldre gruppe. Hallinggutane vann prisen for beste innslag, yngre gruppe, medan Anders Halls felegruppe vann humorprisen for sin "Svenske Polka".
 .jpg) .jpg)
|